14/04/16

LIS ILUSTRAZIONS DI CUVIERTE


Gno pari al jere ancjemò daûr a voltâ par furlan - o pensi pe seconde volte - la Comedie, cuant che mi à fevelât di un strani "efiet colaterâl" che i steve dant cheste sô passion: vint svilupât une familiaritât profonde cu la maniere di contâ dal Poete, i someave di viodi il mont come se lui al fos Dante in persone. Cuant che mê mari mi à domandât di ilustrâ lis cuviertis de prime edizion de sô fadie, o ai  decidût di cirî di rindi par imagjins chest sens profont di identitât tra lui e Dante. 

Par merit de totâl libertât che mi àn lassade sedi gno pari, sedi la editore, o ai vût la possibilitât di lavorâ tor une idee che mi a simpri compagnade, ven a stâi la rapresentazion di une vision une vore sogjetive: chê di assumi no dome il pont di viste dal protagonist (ce che lui al viôt dulintor), ma chê di sburtâ ancjemò plui indentri la vision, par zontâ sensazions peadis al cuarp. Dante al semene in dute la sô opare particolârs che a rindin realistiche la conte dal Viaç par dimostrâ che al jere no dome une aventure inteletuâl e spirituâl, ma ancje e soredut fisiche; duncje no ai vût dificoltât a incuadrâ dai moments significatîfs - un par Cantiche - dulà che l'acent al fos sul moviment dal cuarp di Dante tal spazi.
Cuant che o ai podût scoltâ la vôs di gno pari che al recitave i tocs dal CD audio allegât, mi soi convinçude di vê fat la sielte juste, parcè che midiant chest epic lavôr di traduzion par furlan, gno pari al à svicinât l'univiers di Dante a la nestre realtât, cussì dongje di podê vivi la aventure dal Poete come se al fos il nestri cuarp a colâ tal Infier, a rimpinâsi cun fadie su pe mont dal Purgatori e a svolâ te imensitât dai cîi dal Paradîs. 
                                                            
                                                                                     Marta (marta.venuti@gmail.com)
                                                                                               






                                                                                                      
    

Nessun commento:

Posta un commento

coments