VITA NOVA ( XXII )

No forin passâts tancj dîs, cuant che [ai ultins di Dicembar dal 1289] par volontât dal Signôr, che nol veve dineât a se midiesim la muart, il pari di tante maravee concentrade te zentilissime, lant fûr di cheste vite, al vuadagnà dret la glorie eterne. Considerant cetant che une simil partence e sedi dolorose par chei che a restin e pai amîs; e considerant che nissun afiet al sedi cussì fuart tant che l’afiet tra un bon pari e un bon fi; e che une vore buine e jere cheste femine e une vore bon, a dite di ducj, al jere chest pari, al pâr evident che jê e fos sbalsamade dal dolôr. E dal moment che e jere usance te nestre citât di unîsi pal corot oms cun oms e feminis cun feminis, tantis di lôr si jerin dadis dongje dulà che Beatrice e vaive. Cuant che a tornavin indaûr, mi capità di scoltâ ce che a disevin de zentilissime e dai siei laments: «Sigûr, jê e patìs tant, che a cui che le viôt i cole il cûr di compassion». 

Ladis vie chestis feminis, mi cjapà une tâl avilizion che mi vignivin jù des lagrimis che jo o cirivi di platâ cu lis mans. E stant che o volevi sintî fevelâ ancjemò di jê, o restai dulà che a passavin lis feminis che a levin a puartâi confuart, pront a platâmi se mi fos capitât di metimi a vaî in mût plui evident. O rivai a sintî cualchi pinsîr dai lôr: «Cemût nô podaressino jessi legris, dopo di vêle viodude tant disperade?». Ciertis a disevin: «Chest om al vai come se le ves viodude ancje lui». E altris, fevelant di me: «Viodêso? Nol pâr plui lui!». O sintivi fevelâ di jê e di me, e alore o decidei di scrivi ce che o vevi sintût di chestis feminis, parcè che mi pareve di fâlu cul necessari rispiet. Dal moment che o varès volintîr fevelât cun lôr, tal prin sonet Vo che o puartais tant fuarte induliance o fâs come se ur ves realmentri dreçade la peraule.

Vô che o puartais tant fuarte induliance,

che o tignîs i voi bas, mostrant dolôr,

dontri vignîso che o vês un colôr

che de pietât al pâr la someance?

Vêso viodude la zentîl creance

bagnâ dentri i siei voi vaint Amôr?

Disêmal, voaltris, che jo ’nd ai sentôr,

parcè che us viôt passâ cence baldance.

Se là o vês viodût tante pietât,

us prei di stâ un pôc culì difûr

a fevelâ di jê, che o soi turbât.

Us viôt tai voi lagrimis e scatûr,

e o passais cun aspiet tant sfigurât,

che dome a viodius mi si strenç il cûr.

Tal secont sonet Sêstu tu chel che al à tratât dispès o fâs come se lôr mi vessin pardabon rispuindût.

Sêstu tu chel che al à tratât dispès,

cun nô dome a peraulis, di madone?

Tu di vôs tu i someis come persone,

ma di aspiet no tu paris plui chel stes.

Parcè vaistu e parcè chi si resone

come se il mont di te pietât al ves?

Le âstu viodude in lagrimis, che spes

no tu scuindis dolôr che nol perdone?

Lassinus nô vaî e lâ scunidis

(al fale cui che al ven e nus confuarte),

che o vin sintût lis sôs vôs avilidis.

E ten tai voi jê la pietât tant fuarte,

che se cjalât o ves lis sôs feridis

devant di jê o sarès colade muarte.