INT & INT (dretis di prosodie - 1)

Par une corete leture, e covente esaminade cualchi drete di prosodie furlane, in mût che tal lei no sedi alterade la musicalitât dal viers.

LA ELISION

L'articul determinatîf si pues apostrofâ devant di vocâl tant tal masculin che tal feminin:

L'amôr che ret al ben sovran al smire (Pd XV 2).

(l'amôr = lu amôr).

Cussì si proferì l'ombre di Anchise (Pd XV 25).

(l'ombre = la ombre).

L'articul indeterminatîf  di norme no si apostrofe:

Un altri o viodei movisi sgurlant (Pd XVIII 41).

Int puarte dome une olme lizerine (Pd V 11)

(une-olme : sinalefe).

A puedin elidisi lis coniunzions "che" e "se" devant di peraule che e scomence par vocâl, se lu domande il ritmi dal viers, e dome devant di pronon pleonastic sogjet:

Un troi vualîf ch'al puarte a flanc de cave (Pg VII 71).

(ch'al = che al).

Che s'o lessin framieç di lôr te plane (Pg VII 90).

(s'o = se o).

INT & INT

Il tiermin "int" al tocje dôs peraulis omografis che a vegnin di etims diferents: 1. int averbi e 2. int sostantîf.

1. L'averbi "int" (< i n d e ) si presente in forme proclitiche, ven a stâi si poie sul acent de peraule che e ven dopo, e cun di plui si lee in sinalefe cu la peraule che e ven prime, ma dome se cheste e finìs par vocâl atone (o ben cence arsi):

Ma la nature int pues restâ scuarnade (Pg X 33)

(nature-int : sinalefe).

Ma come cui che al cjale e int trai fûr gjonde (Pg XXIV 34)

(cjale-e-int : sinalefe).

Prin che Fidrì int ves cjatât ciment (Pg XVI 139)

(Fidrì / int : dialefe o iât o cesure).

Che jo int puarti vergogne e smare in cîl (Pd XXVII 54)

(jo-int: sinalefe; i acents ritmics a son: 3 - 6 - 8 - 10).

2. il non feminin "int" (< g e n t e m ) nol vûl di norme la sinalefe, parcè che la vocâl iniziâl e nas de fusion cu la semiconsonant "j" (g e n t e m > gent > gjent > jent > înt > int) e di conseguence tal viers e pues puartâ l'acent ritmic; in ogni câs, se si cjate in tesi (cence acent ritmic) e preferìs stâ in dialefe (stacade de vocâl che e ven prime). Si pues vê une sinalefe dome se "int" si cjate in cesure semicuinarie, ven a stâi tal pieç dal endecasilabi e dopo l'acent di une peraule plane che e finìs par vocâl; ta chest câs si otegnin doi acents tacâts cuntun efiet ritmic simil a chel de cesure tal pentametri latin:

Pise, Pise, vituperi de int (If XXXIII 92).

(de / int : dialefe; "int" e je silabe in arsi numar 10).

La gnove int e i siei asiâts vuadagns (If XVI 73).

(gnove / int : dialefe; "int" e je in arsi numar 4).

Un trop di int poiade tor il cret (Pg XIII 45).

(di / int : dialefe; "int" e je in arsi 4).

O viodei int fondade intune ferde (If XVII 113).

(viodei / int : dialefe; "int" e je in tesi 4).

Ma no rît la ledrose int provençâl (Pd VI 130).

(ledrose-int : sinalefe cun peraule plane tal mieç dal viers).