IL PAN DAI AGNUI

Daûr de leç de alternance, carateristiche dal Paradîs, a doi cjants une vore vîfs, XI e XII, incentrâts su lis figuris di Francesc e Domeni, si inserìs il cjant XIII, li che si dibatin dome cuestions teorichis. Tomâs di Aquin (Pd XIII 52-81) al sclarìs un probleme tant dibatût te ete di Dante: cemût isal che la sostance des robis creadis di Diu, che al è perfezion assolude, e je sogjete a coruzion?

O vuei fevelâ di chest par mostrâ che, ancje in presince di un test dûr di capî e che al rapresente une crôs pe esegjesi, la semplice traduzion tune altre lenghe e pues puartâ cualchi lum.

Ce che nol mûr e ce che al pues murî (v.52), ven a stâi la sostance imortâl (la materie prime, i agnui, i Cîi, la anime) e la sostance destinade a coruzion (il cuarp, la materie sensibil) a son dome un riflès dal progjet divin. La Trinitât cuntun at di amôr si iradie in nûf esencis (lis gjerarchiis angjelichis), che in seconde istance si iradiin a formâ lis curtis contingjencis (v.63) de materie sensibil, destinade a deperî. Tomâs al ricôr ae metafore de cere par rindi comprensibil il progjet trinitari: la cere e je chel materiâl che l'artist al dopre par fâ il model esemplâr de sô creazion. La cere che Diu al dopre e je materie perfete, o ben e corispuint ad implen al progjet ideâl; chê doprade des nûf essencis e pues pierdi la perfezion a man a man che si slontane de sô sorzint, dal progjet primari: par chest no puedin esisti doi individuis compagns; doi pomârs de stesse specie a puedin frutâ pome plui o mancul buine; un artist se i trame la man al pues creâ alc che nol corispuint ae sô idee. E chi si inserìs la tiercine che e à fat deventâ mats i critics (Pd XIII 79-81):

Però se il caldo amor la chiara vista

de la prima virtù dispone e segna,

tutta la perfezion quivi s'acquista.

Cuant che il Sant Spirit incjarnât in Crist (= il caldo amore) al realize a la perfezion il sflandorôs progjet (= la chiara vista) dal Pari (= de la prima virtû), ancje la cere doprade e à la impronte de perfezion.

Duncje se il cjalt amôr la clare viste

de virtût prime al dopre e dret al segne,

dute la perfezion la cere e cuiste.

Al bastave dâ a "però" (v. 79) sfumature conclusive (come dispès in Dante) e inserî "quivi" (v. 81) dentri la metafore de cere, il materiâl che l'artist al plasme prime di realizâ il progjet. Chest al spieghe i concets enunziâts subit dopo: Adam al è stât creât perfet, libar ancje di fâ pecjât di supierbie; e perfet al è stât creât Crist che si è incjarnât par redimi il pecjât di Adam.