VITA NOVA ( XXXI )

Une vore a dilunc o vevi vaît e i miei voi a jerin tant stracs che no rivavin plui a sfogâ la mê disperazion, alore o pensai di sfogâle par mieç de musiche e o decidei di scrivi une cjançon li che vaint o resonàs di jê che, a cause sô, il dolôr al steve devastant la mê anime; e o començai a scrivi la cjançon “La dolorose cundizion dal cûr”… [A son cinc stanziis di cutuardis viers endecasilabis, fale un setenari (il diesim), che a rimin ABC/ABC/CDE/eDE/FF; la cjançon si siere cuntun congjêt di sîs viers (endecasilabis, il tierç setenari) che a rimin ABbCCB].

La dolorose cundizion dal cûr,

che e à fat patî di lagrimis i voi,

dal dut tronfâts, ju à metûts in crôs.

Se o vuei cumò sfogâ il gno lancûr,

che jo par chest dacîs de muart o soi,

mi conven lamentâmi a plene vôs.

E stant che jo mi visi che amorôs

o ai fevelât di jê co vive e jere

cun voaltris, che zentîl anime o vês,

o vuei dome cun chês

come vô, fevelâ in avuâl maniere;

cjantâ e lagrimâ o sintarês,

parcè che e je svolade in Paradîs,

lassant dubiôs chi Amôr al improvîs.

Beatrice e je svolade tal cîl alt,

il ream dulà che i agnui a àn pâs;

e sta cun lôr e il mont e à bandonât:

no nus e à gjavade il masse cjalt

ni il masse frêt, come par solit câs,

ma dome e fo la grande sô bontât;

la sflandorose lûs de sô umiltât

e passà jenfri i cîi tant ad implen,

di fâ maraveâ ancje il Signôr,

che desideri e amôr

al à vût di clamâ dut chel grant ben;

di cajù le à clamade al so sflandôr:

lui al viodeve che il nestri mont vîl

nol jere degn di robe tant zentîl.

E à bandonât la sô biele persone

plene di grazie chê anime zentîl,

e cumò tun lûc degn e sta gloriose.

Cui che nol vai cuant che di jê al resone,

al à di piere il cûr, salvadi e vîl,

li che no pues jentrâi plete afetuose.

No esist al mont persone tant ruspiose,

se pûr di inzen, che le vedi iniment,

cence butâ lagrime ni suspîr,

ma i ven pene e desîr

di murì di lambic e di torment,

e i gjave a l’anime fin il pinsîr

di trop biele che e je stade une volte,

e di cemût che nus je stade cjolte.

Il suspirâ mi fâs ingôs tant fuart,

cuant che il pinsîr mi ripuarte iniment

la situazion che mi à spacât il cûr:

e pensant une vore spes ae muart,

mi nas dentri soâf un sintiment,

che ogni colôr dal vîs mi pare fûr.

E cuant che il magjinâ si fâs plui dûr,

mi rive tante pene di ogni aspiet,

che o trami dut pal grant dolôr che o sint,

e alore jo mi scuint

li che o pues par vergogne o par sospiet.

A la fin di bessôl o dîs vaint:

«Beatrice, o Beatrice, sêstu muarte?».

E tant che jo le clami, mi confuarte.

Vaî di dûl e suspirâ di ingôs

mi fische, cuant che o soi sôl inalgò,

di impietosî cui che sintîmi al pues:

ce che o ai passât, dopo che o ai vude vôs

che madone tornade e je inniò,

lenghe mortâl no je che lu disès:

par chest, madonis, ancje se o volès,

no savarès dîus ben ce cundizion

che o ai, tant cheste vite mi tormente;

tant a parâsi e stente,

che ducj par chê mi disin: «Ce durion!»,

viodint il lavri sut, la bocje sfrente.

Però madone e sa chel che jo o soi,

e comprension o lei intai siei voi.

Cjançon pietose mê, cumò partìs;

cîr lis feminis e lis damiselis,

che za lis tôs surelis

ur àn puartât ligrie e gaiosetât;

e tu, fie di dûl e di pietât,

va sconsolade cun chês puemis bielis.