24/07/17

VITA NUOVA (XV - XVI)


XV – Dopo la ultime trasfigurazion mi vignì un strapinsîr che nol voleve bandonâmi e che cun me al resonave ta cheste maniere: «Dal moment che tu rivis al pont di cuistâ un aspiet cussì ridicul cuant che tu sês in presince di cheste persone, parcè alore ciristu di cori a viodile? E se jê ti domandàs alc, ce varessistu di rispuindii?». A chest pinsîr i rispuindeve, umil, chest altri: «Se jo no pierdès lis mês fuarcis, e mi sintìs dal dut libar di podêi rispuindi, jo i disarès che cuant che mi imagjini la sô bielece, in chel moment istès mi ven un desideri di viodile tant fuart che al sassine e al disintegre inte memorie dut ce che al podarès fâi cuintri; par chest lis esperiencis dal passât no rivin a gjavâmi il desideri di viodile». Cun chescj pinsîrs o cjapai la decision di scrivi il sonet Ce che al sucêt, par scusâmi cun jê e par fâi capî ce che mi sucêt cuant che o soi in sô presince.

Ce che al sucêt, inte memorie al mûr,
cuant che a viodius o ven, preziose zoie;
e cuant che us stoi daprûf, Amôr daûr
mi dîs: «Scjampe, se di vivi tu âs voie».

L’aspiet al mostre il sblancjament dal cûr,
che, stramurtît, dulà che al pues si poie;
al trime scaturît, poiantsi a un mûr,
e ogni piere si môf e lu scjafoie.

Cui che cussì mi viôt, al fâs pecjât
se l’anime spauride nol confuarte,
se dome par pietât mi mostre dûl,

pietât che vô, sorant, o vês copât,
pietât che e nas de cjaladure muarte
di cui che dome di murî al vûl.

XVI – Dopo che o vei scrit chest sonet, mi vignì la idee di contâ uns cuatri robis tor la mê cundizion che mi pareve di no vê ancjemò contadis. Une e jere che une vore dispès mi faseve mâl che la memorie e stiçàs la mê fantasie a imagjinâ cemût che Amôr mi sacodave. Une altre e jere che Amôr dispès mi assaltave dut intun moment, in maniere tant violente, che a mi no mi restave nuie di vîf se no il pinsîr di cheste femine. La tierce e jere che quant che Amôr al combateve cun me ta chest mût, jo o partivi, blanc in muse, a cirî di viodile, cul pinsîr che il fat di viodile mi varès permetût di vinci cheste bataie, e cence cjapâ in considerazion ce che mi podeve capitâ cuant che o fos dongje di jê. La cuarte e jere che viodile no dome no mi judave a difindimi dal atac, ma anzit mi cjoleve vie chel pôc di vite che mi restave. Alore o scrivei il sonet Cetant dispès.

Cetant dispès che a tornin iniment
i efiets ingrisulants che Amôr mi done;
m’int ven tante pietât, che in chel moment
mi dîs: «Plui mâl di me staie persone?»;

Amôr mi cjape in mût cussì violent
che mi pâr che la vite mi bandone:
dentri mi reste vîf dome il frament
di vite che di vô cun me al resone.

Mi dîs alore che mi vuei judâ:
e come muart, di ogni fuarce svuedât,
o côr di vô, crodint che o pues vuarî:

ma po se i voi o alzi par cjalâ,
un taramot mi cjape il cûr scjassât,
che l’anime mi fâs dai pols partî.














Nessun commento:

Posta un commento

coments