La Monarchia e je un tratât di argoment politic, scrit in latin tra il 1312 e il 1313, e no tra il 1307 e il 1308 - come che si pensave une volte. E al è cui che al met la sô stesure nuie mancul che tor il 1317.
La opare si divît in trê libris e e corispuint a un dissen rigorôs, basât su di une argomentazion une vore lucide e su di une esposizion une vore coerente: il stes dissen che al fâs di fonde ae Comedie.
Tal prin libri e je dimostrade la necessitât di vê un sôl Monarcje: ce che al è unic al corispuint al ben, tant che la molteplicitât e corispuint al mâl. Cheste asserzion e je di ordin teologjic: l'Un al è il medium, ven a stâi la interposizion, jenfri l'Ent e il Ben; di conseguence l'Ent al è par fuarce Un e l'Un al è par fuarce Ben. Di cheste premesse al ven fûr che dome un Monarcje unic al pues operâ pal ben comun, parcè che dome lui al pues rapresentâ dutis lis personis, al di là dai particolarisims e des passions dai singui individuis.
Tal secont libri al è dimostrât cemût che il popul roman al sedi stât depositari de maestât imperiâl, dal moment che i Romans a àn realizât il dissen di Diu, chel di someti il mont secont dirit, pal ben universâl. Cheste tesi e je sostignude di une grande schirie di esemplis, li che il valôr dai singui al ven esercitât in non de grandece di Rome e in rispiet de leç.
Il tierç libri, ultin te sucession de opare, ma prin par impuartance, al fronte la teoresi de autoritât e dal podê. Ogni autoritât e ven jù di Diu. La autoritât e je la manifestazion de virtût che e nas dal jessi inserîts tal ordin naturâl stabilît di Diu.
Tes intenzions dal Creatôr ogni realtât, in armonie cun dut il rest, e ponte a la sodisfazion di un fin. Ogni realtât e cjape autoritât di Diu, che le à creade predisponude a chest, orientade al consens divin e inseride tal ordin predestinât.
Cussì la Lune e cjape il so splendôr dal Soreli che le ilumine, ma la sô essence no dipent di chest; ancje il cuarp al è sometût a l' anime, tal sens che cheste lu vuide, ma les leçs dal cuarp no dipendin da l'anime, parcè che a vegnin cence mediazion de ment di Diu.
Intal stes mût Papât e Imperi a gjavin la lôr autoritât di Diu, e par chest nol pues jessi che l'un al dipendi di chel altri, e nancje l'incontrari; ma al è vêr che a varessin di lavorâ insiemi par rivâ al fin comun, ven a stâi a la felicitât terene che e je competence imperiâl, tant che anticipazion de felicitât celeste, che invecit al è compit dal Papât di preparâle.
Nessun commento:
Posta un commento
coments