Il Convivio
("Simposi") al è une opare dotrinâl scrite in volgâr
jenfri il 1304 e il 1307, dopo il faliment de azion politiche, intant
dal esili; al veve di jessi formât di 15 tratâts, un di introduzion
e 14 di coment a altretantis cjançons ispiradis a argoments dibatûts
tes clapis culturâls dal timp. L'opare e je ferme al cuart tratât,
ma dut lasse pensâ che l'Autôr al varès ripiât in man il progjet,
une volte finide la Comedie,
e une volte tornât a Florence.
Il tratât introdutîf al individue
l'argoment gjenerâl: un invît a partecipâ al simposi di sapience,
ufiert a ducj, ma soredut ai miseri, a chei che - no par
colpe lôr - no àn podût indutrinâsi. Dante al rinunzie, par
cheste opare, a doprâ la lenghe des Scholae, il latin, parcè che il
volgâr al è plui vicin ai laici desiderôs di fâsi une
culture, e parcè che il volgâr al è destinât a imponisi no dome
te poesie, ma in ducj i setôrs de cognossince.
Il secont tratât al è dedicât al
coment de cjançon Voi che 'ntendendo il terzo ciel movete,
citade ancje te Comedie
(Pd
VIII 37), e al rivuarde in particolâr la esposizion dai cuatri sens
des scrituris.
Il tierç tratât, ispirât ae
cjançon Amor che ne la mente mi ragiona, al è une laude
de sapience e de filosofie come confuart de ment.
Il cuart, comentant la cjançon Le
dolci rime d'amor ch' i' solìa, al confute il concet de
nobiltât tant che fat leât ae nassite: la vere nobiltât no ven jù
de ereditât o de gjernazie antighe, ma e nas de virtût e de purece
di cûr.
Il Convivio si presente tant che un zibaldon, che al met adun elements interessants de
personalitât e de culture di Dante e int mostre la fuarte dreture
morâl, centrade su la atente selezion di autôrs e tescj, chei stes
che a stan a fondament de Comedie.
Nessun commento:
Posta un commento
coments