ARMONIE IMITATIVE TAL FURLAN - 1

In musiche il compositôr al è spes tentât di puartâ dentri il spartît il sclipignâ di une fontane, il cisicâ des fueis e dal vint, il cjant dai uciei, i tons di un temporâl. E je chê armonie imitative che il poete al ricree cul ritmi dal viers o cul sun des peraulis. In Dante, il sborf che al va di cise in cise, sot la scorie de canicule (If XXV 81):

folgore par se la via attraversa.

La velocitât e je dade dal acent iniziâl e dal corisi daûr di trê datii cun trocheu finâl (un hemiepes fundût cuntune clausole datiliche):

fólgore / pàrsela / vìattra / vèrsa

— UU / — UU / — UU / —U

L'efiet contrari Dante lu oten taiant la teste dal viers e scandint il ritmi cuntune cjadene di spondeus, tant che tal trimetri jambic. Pôc prime di fevelâ dal sborf, ancje par dâi a chest plui risalt, al fevele di un danât che al è restât vitime di une spaventose metamorfosi e si slontane a planc dut incocalît (If XXV 78):

parea; e tal sen gio con lento passo.

La lentece e ven fûr te leture ritmiche:

parè-//-aetàl / sengìo / conlèn / topàs / so

U — // U — / U — / U — / U — / U

La armonie imitative, che e compâr te poesie di ogni ete, si pues doprâle ancje te poesie furlane, in mût particolâr cuant che tal cors de traduzion si à di rindi fedelmentri lis finecis dal origjinâl. Oltri e di plui che no cul ritmi dai viers, il furlan si preste a fâ musiche cul rivoc des peraulis, come che si pues viodi ancje tal voltâ il toc culì riclamât. (Esemplis analitics a vignaran fats plui indenant). 

If XXV 76-84:

Ogne primaio aspetto ivi era casso:	Ogni primari aspiet sparît a slas,
due e nessun l'imagine perversa	dôs e nissune e jere la figure
parea; e tal sen gio con lento passo.	trasformade; e al le vie lent il pas.
Come 'l ramarro sotto la gran fersa	Come il sborf sot la scorie de calure
dei dì canicular, cangiando sepe,	caniculâr, passant di cise in cise,
folgore par se la via attraversa,	fulmin al pâr sul troi di tiere dure:
sì pareva, venendo verso l'epe	propit pareli a chel, di bot si sfrise
de li altri due, un serpentello acceso,	viers di chei doi un madracut spirtât,
livido e nero come gran di pepe.	livit e neri tant che la cinise.