18/06/16

ARMONIE IMITATIVE TAL FURLAN - 2



No si contin te Comedie i tocs trasfomâts in musiche de plume dal Florentin, che tal voltâju par furlan a permetin une cierte autonomie di adatament ae gnove prosodie. In Dante al element fantastic si alterne dispès chel realistic e visîf, par da al implant naratîf consistence e veretât, come tal preludi dal cjant di Pieri de Vigne (If XIII 40-44):

Come d'un stizzo verde ch'arso sia
da l'un de' capi, che da l'altro geme
e cigola per vento che va via,

sì de la scheggia rotta usciva insieme
parole e sangue;...


La musiche e ven fûr de poliritmie e des rimis, ma ancje dal incrosâsi di peraulis e consonancis evocativis (stizzo / scheggia; geme / cigola; verde / vento e v.i.). Musiche e nas ancje de costruzion latine dal verp "usciva" predicât di doi sogjets,  che in furlan e sarès masse ardide. 

Al sucêt di stiç vert, se fûc i dan
par une bande, che par l'altre al zemi
e al cisi fûr i spirts che dentri i stan,

cussì a vignivin fûr de sclese insiemi
sanc e peraulis;...

Tal intindiment di meti in evidence l'element musicâl, in furlan al è stât fat in mût che l'element realistic de similitudin si soreponès a la narazion fantastiche, cu la semplice eliminazion dal prin tiermin di paragon.

Nessun commento:

Posta un commento

coments