VITA NOVA ( XXXV - XXXVI )

XXXV - Un pôcs di dîs plui tart, co mi cjatavi tun puest che mi memoreave il timp passât, o stevi tant pensierôs e inmarumît che o vevi cjapât un aspiet di teribil scaturiment. Rindintmi cont che la mê cundizion e trasparive ancje par di fûr, o alçai i voi par viodi se altris mi cjalassin; alore o viodei une zentildone zovine une vore biele, che da un barcon mi cjalave cun muse pietose e, di ce che si podeve capî, mi pareve che intor e ves dute la pietât dal mont. E, dal moment che un om disditât se al viôt cualchidun altri movût a compassion par lui i ven sù la stomegane, mi sintii cjapâ di fuarte pietât par me stes e une urgjente scugne di metimi a vaî. E, par no dâ spetacul di debeltât, mi slontanai di li cun cheste pensade: «Nol pues jessi che ta cheste femine pietose nol sedi un fuart sintiment di amôr». O decidei alore di scrivi il sonet Mi inacuarzei (Videro gli occhi miei), rimis: ABBA ABBA CDE EDC, li che fevelant cun jê o metès in struc dute la cuistion.

Videro li occhi miei quanta pietate	Mi inacuarzei di ce tante pietât
era apparita in la vostra figura	che e comparive te vuestre figure
quando guardaste li atti e la statura	cuant che o cjalavis chê ande insigure
ch'io faccio per dolor molte fiate.	che o ten cuant che mi sint indolentrât.
Allor m'accorsi che voi pensavate	O capivi che o vês argomentât
la qualità de la mia vita oscura,	la cundizion de mê strane nature,
sì che mi giunse ne lo cor paura	e sobri mi folcjà oltri misure
di dimostrar con li occhi mia viltate.	che si viodès di fûr la mê viltât.
E tolsimi dinanzi a voi, sentendo	E di vô mi sghindai vie, sintint
che si movean le lagrime dal core,	a movisi sustadis di dolôr
ch'era sommosso de la vostra vista.	tal cûr taramotât de vuestre olmade.
Io dicea poscia ne l'anima trista:	E o disevi cu l'anime cruziade:
«Ben è con quella donna quello Amore	«Cun che femine al sta chel stes Amôr
lo qual mi face andar così piangendo».	che mi fâs cori ator disfat vaint».

XXXVI - Al capità daspò che pardut là che cheste femine mi viodeve, e cjapave une parvince compassionevul e un palôr che a fasevin cuasi pensâ che e fos inamorade e mi puartavin une vore dispès a pensâ ae mê nobilissime, che e jere par nature dotade di chel colôr. E sigûr, stant che no podevi ni metimi a vaî ni disfogâ il gno malincûr, o fasevi di dut par viodi cheste femine pietose, che e someave che mi gjavàs fûr lis lagrimis dai voi dome tal cjalâmi. Par chest mi è vignude la volontât di scrivi il sonet Colôr di Amôr (Color d'amore), che al à scheme rimic ABBA ABBA CDE DCE.

Color d'amore e di pietà sembianti	Colôr di amôr e di pietât someance
non preser mai così mirabilmente	no à mai cjapât in mût tant evident
viso di donna, per veder sovente	muse di dame, a viodi ogni moment
occhi gentili o dolorosi pianti,	voi zentîi lagrimâ cence sperance,
come lo vostro, qualora davanti	tant che la vuestre, se inte vicinance
vedetevi la mia labbia dolente,	us capite di viodi il gno torment;
sì che per voi mi ven cosa alla mente,	par vuestri mieç mi ven cjosse iniment
ch'io temo forte non lo cor si schianti.	che al cûr crepât i mancji condurance.
Eo non posso tener li occhi distrutti	Jo no pues tratignî i miei voi stronfâts
che non riguardin voi spesse fiate,	dal cjalâus e tornâ a cjalâus dispès,
per desiderio di pianger ch'elli hanno:	pe voie di vaî che lôr a àn:
e voi crescete sì lor volontate,	e par vô la lôr volontât e cres
che della voglia si consuman tutti;	tant che la voie ju à ducj consumâts;
ma lagrimar dinanzi a voi non sanno.	ma lagrimâ devant di vô no san.

VITA NOVA ( XXXIV )

XXXIV - Te zornade dal prin aniversari di Beatrice deventade citadine de vite eterne, jo o jeri sentât tun puest dulà che, pensant a jê, o stevi dissegnant un agnul sore breutis di pueste; a un ciert pont, alçant i voi, o viôt dongje di me personis degnis di onôr, che a stevin osservant ce che o fasevi. O soi vignût a savê plui tart che a jerin li di un pieç, prime che jo mi fos visât di lôr. Mi alci in pîts, ju saludi e ur dîs: «Fintremai cumò altris a jerin cun me; ve ca mo parcè che o jeri sorepinsîr». Lâts vie lôr, o soi tornât ai miei agnui e tal mintri che o pituravi mi è vignude la pensade di memoreâ l'aniversari cun alc di scrit, dedicantlu a chei che a jerin vignûts a viodi ce che o fasevi. O ai componût alore il sonet E vignive (Era venuta), che al à doi començaments e scheme rimic ABBA ABBA CDE DCE.

Primo cominciamento	Prin començament
Era venuta ne la mente mia	E vignive te mê ment di fûrvie
la gentil donna che per suo valore	la femine zentîl che pal valôr
fu posta da l'altissimo signore	e fo logade dal plui alt signôr
nel ciel de l'umiltate, ov'è Maria.	tal cîl de umiltât, li di Marie.
Secondo cominciamento	Secont començament
Era venuta ne la mente mia	E vignive te mê ment di fûrvie
quella donna gentil cui piange Amore,	la femine zentîl che al vai Amôr,
entro 'n quel punto che lo suo valore	propit ta chel moment che il so valôr
vi trasse a riguardar quel ch'eo facia.	us à clamâts aprûf de mê fadie.
Amor che ne la mente la sentia	Le sint Amôr che tal pinsîr si impie,
s'era svegliato nel destrutto core,	sveantsi dentri il cûr rot dal dolôr,
e diceva a' sospiri: «Andate fore»;	e al comande i suspîrs al lôr lavôr,
per che ciascun dolente si partia.	po ducj dulints adun a jessin vie.
Piangendo uscivan for de lo mio petto	Lôr a jessin vaint fûr dal gno pet
con una voce che sovente mena	cuntune vôs che a l'ocasion e implene
le lagrime dogliose a li occhi tristi.	di lagrimis i voi e il cûr a fîl.
Ma quei che n'uscian for con maggior pena,	Ma chei che a vegnin fûr cun plui gran pene
venian dicendo: «Oi nobile intelletto,	a van disint: «Oi nobil intelet,
oggi fa l'anno che nel ciel salisti».	vuê si fâs l'an che tu sês lât in cîl».

VIERTIDURIS

No si à mai insistût avonde su la musicalitât de struture compositive e sul timbri musicâl di ogni cjant de Comedie, li che lis primis tiercinis a formin come il preludi di un poeme sinfonic, e nus metin dentri di un senari conciertistic tratât cu la maestrie organistiche di Sebastian Bach. A son tocs che a dan colôr e tonalitât a dut il cjant, cence pierdi la lôr autonomie, tant che lis ouvertures des oparis lirichis. Sedi la sielte e la disposizion des peraulis dentri dai viers, sedi la ispirazion esoteriche ("Minerva spira, e conducemi Apollo, / e nove Muse mi dimostran l'Orse" Pd II 6-7), sedi la naturâl sensibilitât compositive dal poete, a spandin une armonie che e cjape il fonts da l' anime:

O voi che siete in piccioletta barca,

desiderosi di ascoltar, seguìti

dietro al mio legno che cantando varca,

tornate a riveder li vostri liti:

non vi mettete in pelago, chè, forse,

perdendo me, rimarreste smarriti.

L'acqua ch'io prendo già mai non si corse:

Minerva spira, e conducemi Apollo,

e nove Muse mi dimostran l'Orse.

Voi altri pochi, che drizzaste il collo

per tempo al pan de li angeli, del quale

vivesi qui ma non sen ven satollo,

metter potete ben per l'alto sale

vostro navigio, servando il mio solco

dinanzi a l'acqua che ritorna equale.

Que' gloriosi che passaro al Colco

non s'ammiraron, come voi farete,

quando Iason vider fatto bifolco.

PUNTUAZION TE "VITA NOVA"

Te Vita Nova, cuant che al ven presentât un sonet o une cjançon, Dante si preocupe di frazionâ il test tai siei elements costitutîfs, cence jentrâ cuasi mai tai significâts o tal lôr profondiment, come che un letôr di vuê si spietarès. Visionant i manoscrits antîcs, si capìs il parcè di chest mût di fâ, tant strani pe sensibilitât di vuê, ce che al risulte par esempli ta cheste citazion:

«Io dico che questa cattivella canzone ha tre parti: la prima è proemio; ne la seconda ragiono di lei; ne la terza parlo a la canzone pietosamente. La seconda parte comincia quivi: Ita n'è Beatrice; la terza quivi: Pietosa mia canzone. la prima parte si divide in tre: ne la prima dico perchè io mi muovo a dire; ne la seconda dico a cui io voglio dire; ne la terza dico di cui io voglio dire. La seconda comincia quivi: E perché me ricorda; la terza quivi: E dicerò. Poscia quando dico: Ita n'è Beatrice, ragiono di lei; e intorno a ciò foe due parti: prima dico la cagione per che tolta ne fue; appresso dico come altri si piange de la sua partita, e comincia questa parte quivi: Partissi de la sua. Questa parte si divide in tre: ne la prima dico chi non la piange; ne la seconda dico chi la piange; ne la terza dico de la mia condizione. La seconda comincia quivi: Ma ven tristitia e voglia; la terza quivi: Dannomi angoscia. Poscia quando dico: Pietosa mia canzone, parlo a questa canzone, disignandole a quali donne se ne vada, e steasi con loro» (VNXXXI, 2).

Al pâr evident che cheste division dal test in parteselis e pues vê la funzion di judâ e di orientâ i letôrs, intune epoche li che no si doprave ancjemò la puntuazion e i viers a vignivin scrits un daûr di chel altri, cence regulis di division par silabis, cence altri criteri se no chel di sparagnâ cjarte. Pal letôr di vuê, che al à a disposizion une puntuazion sientifiche, lis divisions fatis di Dante no àn plui impuartance, e cheste e je la reson che tal voltâ par furlan la Vita Nova a son stadis ometudis informazions e notazions dal test origjinâl, che a puedin dal sigûr judâ une vore cui che al cure une edizion critiche, ma che no disin nuie di gnûf pal profondiment dal test. Une ultime curiositât: il frament di Trespiano dal XIV secul nus presente un biel toc de cjançon che Dante al trate tal pas sore ripuartât, e nus documente cemût che si scriveve te Ete di Mieç; si pues ancje notâ che cualchidun - forsit une des suorutis agostinianis che lu àn scuviert une cincuantine di agns indaûr - nol à savût tratignîsi dal meti jù cu la matite sul document origjinâl notazions e segns diacritics tirâts fûr di une edizion moderne.

VITA NOVA ( XXXII - XXXIII )

XXXII - Finîde di componi cheste cjançon, al è vignût di me un che, te graduatorie dai miei amîs, al ven subite daûr dal prin, e che al è parint une vore stret di cheste femine gloriose. Tant che o stevin fevelant, al à vude ocasion di domandâmi che o scrivès par lui alc su di une femine che e jere mancjade; si esprimeve in maniere cuvierte, par che o crodès che al fevelave di une altre persone; e jo, che o vevi capît che si riferive propit a cheste benedete, i ai dit che lu varès contentât vulintîr. Cussì o ai pensât ben di scrivi il sonet Vignît dongje a sintî i miei suspîrs, une vore lamentôs, e di dâial in mût che al crodès che lu vevi scrit par lui. Il scheme rimic al è: ABBA ABBA CDE DCE.

Vignît dongje a sintî i miei suspîrs,

o cûrs zentîi, che la pietât lu vûl:

suspîrs che a svolin vie plens di dûl,

ma vîf mi tegnin tant che amîs sincîrs;

parcè che i voi no son bogns conseîrs,

ai jai! plui triscj di chest scuindût carûl,

che al pâr spierdi dal cûr dolôr e nûl,

vaint la done al som dai miei pinsîrs.

Ju sintarês zemint clamâ dispès

la femine zentîl che mo e je lade

tal timp che al è plui degn de sô virtût;

e spreseâ la vite sfortunade,

di chê che al pâr che dome mâl e ves,

e bandonade e fos de sô salût.

LA MATRIE

Dulà ise la Patrie? Indulà vino di meti sù cjase, par finî di cirîle? E je la domande che si faseve Enee e che e fonde la Europe di vuê – domande forsit dal dut dismenteade. I dius a vevin destinât che par Enee cheste Patrie e varès vût di jessi la Italie. Ma la Italie i scjampave simpri. Al eroi che al scjampe i rispuint la Italie che e scjampe, come ai erois di doman che a scjampin e scjamparà la Europe: dulà cheste scomencie? dulà finissie? cualis nazions aie? cualis lidrîs le sostegnino? O ben la sô maludizion ise propit tal no vêlis, tal no vê nuie dulà lidrisâsi? Enee al veve dal sigûr Patrie, anzit: la Patrie, la Ili sacre, la imagjin de citât perfete, guviernade dal Re just e bon, popolade di int che e riten massime virtût il murî pe sô salvece. Enee al varès desiderât di restâ su lis sôs ruvinis pluitost di frontâ il destin di cori daûr ae Italie. Ancje lis maseriis di Troie a saressin stadis par lui "plui" Patrie di cualsisei altre future. Ma la Patrie e je stade sdrumade dai Acheus, dal potent conubi di violence e di astuzie che al caraterize l'esercit, une masse slidrisade dai siei paîs, agnorums lontane di ogni domestic afiet. Tancj di lôr no tornaran, il plui grant al mûr sot lis muris di Ili, cui che ju à vuidâts a cost dal sacrifici de fie al ven sassinât apene metût pît li che al pensave che e fos la sô dimore.

Disgraziâts erois. Cu la fin di Ili chê idee di Patrie e va par simpri a mont. Enee, dut câs, al fonde la gnove citât sburtât de maluserie de Patrie, che lu domee. Cence la fuarce di cheste maluserie, Rome no varès mai podût vignî sù. Ma Rome no pues sei Ili, no 'ndi conserve la lenghe, no sarà mai la citât finide dal dut, contignude in maniere armoniose dentri i siei cunfins; e sarà invecit la citât-che-e-cres, la citât-che-si-môf, Civitas augescens, Civitas mobilis, la citât insaziabil, imperium sine fine, la urbs che e vûl deventâ orbis terrae

LA RIME CREATIVE

Si sa che la rime e pues jentrâ di parone tal procès creatîf, proferint soluzions gnovis e interessantis, e slargjant il cjamp des possibilitâts espressivis. Lu sustignive ancje Leopardi: "Ne' versi rimati, per quanto la rima paia spontanea, e sia lungi dal parere stiracchiata, possiamo dire per esperienza di chi compone, che il concetto è mezzo del poeta, mezzo della rima, e talvolta un terzo di quello e due di questa, talvolta tutto della sola rima. Ma ben pochi son quelli che appartengono interamente al solo poeta, quantunque non paiano stentati, e anzi nati dalla cosa" (Zibaldone, 1821). Dal sigûr Dante nol bacilave tes rimis e al saveve distrigâsi cun gjenialitât intes situazions plui critichis; ma pal tradutôr de  Comedie la tierce rime incjadenade e rapresente un vincul e un vencul, che si pues vignînt fûr dome operant cun cualchi autonomie. Si à però simpri di avodâsi cun discrezion e umiltât a concets come chescj: "Cumò, ta cheste situazion, se al fevelàs e al scrivès te mê lenghe, Dante cemût fasarèssial? Ce podarèssial pensâ di cheste soluzion un espert di Dante e de mê lenghe?".

Distès i risultâts no son mai garantîts e al è simpri cualchidun che al pues viodi  une ingjenuitât, un arbitri o un sfris li che il tradutôr al pensave di vê doprade la plui gjeniâl soluzion espressive pussibil.

Une vore dispès si cjatisi a front de alternative di sacrificâ la rime o di tradî la letare. Partint dal fat che la tierce rime par Dante e rapresente cence mancul la Trinitât e la metafore de Creazion, e che duncje si scuen doprâle (magari ricorint a chêi repeçs che al dopre ancje Dante), bisugne alore, se no tradî la letare, almancul fidâsi a une dose di olse e di umiltât, e operâ in altris direzions. Il câs forsit plui emblematic al è te prime tiercine dal ultin cjant dal Paradîs:

Vergine Madre, figlia del tuo figlio,

umile e alta più che creatura,

termine fisso d'etterno consiglio, 

Vergjine Mari, fie dal to fi,

umil e alte plui che creature,

salût pensade fin de prime dì,  (Pd XXXIII 1-3)

Al salte subit al voli che la traduzion dal tierç viers e je une vore libare.

MALINCÛR

Ce che al da plui sodisfazion a un tradutôr al è chel di rivâ a jentrâ te anime dal autôr, par ricostruî di dentri il procès creatîf, fin dal moment emozionâl che al da struture sensibil al pinsîr. E je cheste la plui alte forme di imitazion, che no à bisugne di nuie di particolâr, al baste lassâsi cjapâ par man dal autôr, che al è simpri pront a tirâti fûr i siei sintiments, e a mostrâti moment par moment lis soluzions plui oportunis. Cheste situazion e pues verificâsi li che la emozion di cui che al compon e je talmentri fuarte che si savolte la struture stesse dal discors: nuie di miôr ce fâ, ta chest câs, se no di voltâ fedelmentri peraule par peraule.

Cuant che Dante al scrîf l'Otâf dal Purgatori al è aromai in esili di passe dîs agns, ma nol rive a dâsi pâs, parcè che si sint vitime di injustizie, e i bruse come cuant che il provediment al fo apene adotât. Lui al imagjine di fâ il so viaç tal 1300, l'an dal Gjubileu, cuant che il so esili al pues jessi ancjemò dome profetât: a la fin dal Cjant al è Conrât di Malespine che i al predîs (Pg VIII 133–139):

E lui: «Va; che il soreli no siet voltis

si pognarà tal jet li che il Monton

al disdulìs lis cuatri talpis sioltis,

che cheste tô cortese opinion

e vignarà inclaudade te tô ment

cun clauts plui salts di cualsisei sermon,

se cors di alt juduzi lu consent».

TRADUZION E IMITAZION

Se l'at dal tradusi al è considerât a nivel di une leture creative, ce che al da plui sodisfazion a cui che al volte un test intune altre lenghe al è chel di simiotâ l'autôr tal so stes stîl e tes sôs propriis formis espressivis, ma stant une vore atents a no scjadi te parodie, che e je la muart de traduzion. Al è vêr che lis peraulis no àn mai corispetîfs precîs tes altris lenghis, par chest o pensi che la aprossimazion di sens e di significât e pues cjatâ compensazion inte creativitât controlade di cui che al vûl esplorâ intune altre lenghe la opare di un autôr; vâl a dî che probabilmentri la strade juste pal trodutôr e je la imitazion.

Un nivel elementâr di imitazion al è chel di doprâ, par esempli, un lengaç colorît, cuant che colorît al è il lengaç dal origjinâl. Al inizi dal XXIII dal Infier Dante e Virgjili si cjatin te cundizion di stâ par frontâ la rabie di une desene di diaui che a àn motîf di volê massacrâju: "Se l'ira sovra 'l mal voler s'aggueffa, / ei ne verrannno dietro più crudeli / che 'l cane a quella lievre ch'elli acceffa" (If XXIII 16-18), dulà che la terminologjie, di proposit slumbriade, di bessole e fâs "tutti li peli arricciar / de la paura" (ibid. 19-20).

Se rabie cun malizie e fâs doplon,

chei nus corin daûr plui scjadenâts

dal cjan ch'al cure il jeur a sdramasson.

Dulà che la atenzion si concentre dute su la slavrade reazion rabiose dal cjan.