VITA NOVA ( XXIII )

Pôcs dîs plui tart al intravignì che di cualchi bande dal gno cuarp mi rivà une dolorose infermitât, che mi ve puartât soferencis cence padin par nûf dîs, e che mi ve imobilizât tant che un paralitic. La novesine zornade, cun dolôrs che no rivavi plui a sopuartâ, mi capità di fâ une dure pensade su madone. La mê vite si leve mostrant tant indeule e tant precarie, ancje se di fonde sane, che dentri di me mi metei a vaî par cheste mê miserie; e suspirant mi disevi: «Al pues di necessitât sucedi che une volte o chê altre Beatrice e mueri». Chest pinsîr mi lassà tant sviersât che o sierai i voi e o scomençai a lavorâ di fantasie e a çavariâ; tal prin mi pareve di viodi musis di feminis sgardufadis che mi disevin: «Ancje tu tu murarâs»; daspò altris musis strassomeadis, di no podê cjalâlis, mi disevin: «Tu tu sês muart». Di fantasie in fantasie o rivai al pont di cjatâmi intun puest che no savevi indulà: feminis sgjaveladis a levin ator par strade vaint, inmarumidis fûr di misure; e mi pareve che il soreli si studàs, che lis stelis in cîl a vaissin, che i uciei a colassin muarts, e che la tiere e fos scjassade dai taramots. Sbalsamât di chestis fantasiis, e plen di pôre, o crodei di viodi un gno amì che al vignive a dîmi: «No lu sâstu ancjemò? La tô mirabil femine e je lade fûr di chest secul». Alore mi metei a vaî in maniere penose, e no dome te imagjinazion ma cun chescj voi e cun lagrimis veris. O imagjinai di cjalâ viers il cîl e mi pareve di viodi un trop di agnui che a tornavin sù, sburtant un piçul nûl cjanôr. E mi pareve che a cjantassin in maniere gloriose Osanna in excelsis; ma no crôt che a vessin dit alc altri.

VITA NOVA ( XXII )

No forin passâts tancj dîs, cuant che [ai ultins di Dicembar dal 1289] par volontât dal Signôr, che nol veve dineât a se midiesim la muart, il pari di tante maravee concentrade te zentilissime, lant fûr di cheste vite, al vuadagnà dret la glorie eterne. Considerant cetant che une simil partence e sedi dolorose par chei che a restin e pai amîs; e considerant che nissun afiet al sedi cussì fuart tant che l’afiet tra un bon pari e un bon fi; e che une vore buine e jere cheste femine e une vore bon, a dite di ducj, al jere chest pari, al pâr evident che jê e fos sbalsamade dal dolôr. E dal moment che e jere usance te nestre citât di unîsi pal corot oms cun oms e feminis cun feminis, tantis di lôr si jerin dadis dongje dulà che Beatrice e vaive. Cuant che a tornavin indaûr, mi capità di scoltâ ce che a disevin de zentilissime e dai siei laments: «Sigûr, jê e patìs tant, che a cui che le viôt i cole il cûr di compassion». 

VITA NOVA (XX - XXI)

XX – La cjançon A dutis vô e ve grant sucès vie pe citât e un ami, che int veve vude cognossince, al fasè la pensade di preâmi che i disès ce che al è Amôr, crodint forsit che o fos un espert in materie. Alore jo, sedi parcè che l’argoment mi interessave, sedi parcè che no si pues da une delusion a un ami, o decidei di scrivi il sonet Amôr e cûr zentîl (Amore e ’l cor gentil).

 

Amore e ’l cor gentil sono una cosa,	Amôr e cûr zentîl une figure
sì come il saggio in suo dittare pone,	sole nus dîs il savi autôr ch’a son,
e così esser l’un senza l’altro osa	e un cence chel altri al configure
com’alma razional sanza ragione.	anime razionâl cence reson.
Falli natura quand’è amorosa,	E ju fâs amorose la nature
Amor per sire e ’l cor per sua magione,	il cûr cjistiel e Amôr il so paron,
dentro la qual dormendo si riposa	che dentri al polse e di restâ al procure
tal volta poca e tal lunga stagione.	mo par curte e mo par lungje stagjon.
Bieltade appare in saggia donna pui,	Te femine virtuose po e compâr
che piace a li occhi sì, che dentro al core	la bielece ch’e incjante i voi e al cûr
nasce un disio de la cosa piacente;	e da il desîr di ce che tant i plâs;
e tanto dura talora in costui,	chest tant al dure e al slûs in mût tant clâr,
che fa svegliar lo spirito d’Amore.	che il spirt di Amôr si svee e al jeve fûr.
E simil face in donna omo valente.	E a femine l’om vêr compagn al fâs.

XXI – Subite dopo mi pià la volontât di scrivi lis laudis de zentilissime, par mostrâ cemût che, midiant di jê, Amôr si svee, e no dome si svee li che al sta impisulât, ma al va ancje dulà che nol varès possibilitât di manifestâsi. E o componei chest sonet: Al vîf tai voi (Ne li occhi porta).

 

Ne li occhi porta la mia donna Amore,	Al vîf tai voi de mê femine Amôr,
per che si fa gentil ciò ch’ella mira;	parcè ch’e fâs biel dut ce ch’e rimire;
ov’ella passa ogn’om ver lei si gira,	li ch’e passe ognidun viers jê si zire,
e cui saluta fa tremar lo core,	e il so salût al cûr al da tremôr;
sì che, bassando il viso, tutto smore,	il cjâf si sbasse e dut al piert colôr,
e d’ogni suo difetto allor sospira:	si contin i difiets e si suspire:
fugge dinanzi a lei superbia ed ira.	devant di jê e fui supierbie e ire.
Aiutatemi, donne, a farle onore.	Judaitmi, dutis vô, a fâi onôr.
Ogni dolcezza, ogni pensero umile	Ogni dolcece, ogni pinsîr garbât
nasce nel core a chi parlar la sente,	cui ch’al sint la sô vôs i nas tal cûr;
ond’è laudato chi prima la vide.	cui che le viôt al merte riverît.
Quel ch’ella par quando un poco sorride,	Ce che si prove cuant che un pôc e rît
non si può dicer né tenere a mente:	nol reste aments, ni si pues pandi fûr:
sì è novo miracolo e gentile.	miracul gnûf e je, e delicât.

VITA NOVA (XVII - XIX)

XVII – Finît di scrivi chescj trê sonets, che a jerin dedicâts a cheste femine dal moment che a esprimevin avonde ben la mê cundizion tai siei confronts, mi pareve che al fos rivât il moment di fermâmi, parcè che o vevi davieret masse i miei sintiments e parcè che o evitavi simpri di metimi in contat cun jê; o decidei alore di frontâ un argoment gnûf e plui elevât. E stant che la ocasion di chest gnûf argoment mi pâr che al sedi gustôs a sintîsi, lu contarai te maniere plui sute pussibil.

XVIII – Jessint che par vie dal gno aspiet tancj di lôr a scrupulavin la mê situazion interiôr, putropis feminis, che une dì si jerin dadis diongje par fâsi legre compagnie e che a cognossevin cheste mê cundizion, parcè che a vevin assistût a tantis des mês sconfitis, mi àn viodût passâ par câs dongje di lôr e mi àn dade une vôs. La femine che mi veve clamât e jere di finis peraulis; jo mi soi prime sigurât che la zentilissime no fos cun lôr e po mi soi tirât dongje e ur ai domandât ce che a volevin. A jerin tantis, e a ’nd jere ciertis che a ridevin tra di lôr; altris che mi cjalavin in spiete di ce che jo ur varès dit. Une di chestis, voltant i voi viers di me e clamantmi par non: «Ce ti spietistu», dissè, «dal amôr di cheste femine, dal moment che no tu puedis sostignî la so presince? Dinusal: ce che tu ti spietis al à sigûr di jessi fûr dal ordenari».

RIME INTERNE - 2

Fuart efiet musicâl a produsin lis rimis dopleadis internis e lis rimis internis cun silabe incuneade (par talian “rima con zeppa”). Tal monolic di Adam (Pd XXVI), che si intaie tant che un assolo te musiche celestial de Candide Rose, si pues tirâ fûr cualchi esempli.

1 – Te rime interne dopleade il setenari al rime cun doi endecasilabis in rime alternade tra di lôr, come in Pd XXVI 106-108:

Perch’io la veggio nel verace speglio

che fa di sé pareglio a l’altre cose,

e nulla face lui di sé pareglio.

Parcè che jo le viôt inta chel spieli

che al fâs di se pareli ogni element,

se pûr no ’nd è nissun che lu pareli.

2 – Te rime interne cun silabe incuneade, come in Pd XXVI 126-137, il setenari al jentre in rime imperfete cuntun endecasilabi adiacent. Tal nestri esempli, cheste e je voltade par furlan cuntune rime interne perfete.

Ché nullo effetto mai razïonabile,

per lo piacere uman che rinnovella

seguendo il cielo, sempre fu durabile.

Opera naturale è ch’uom favella;

ma così o così, natura lascia

poi fare a voi, secondo che v’abbella.

Nissun efiet ch’al sedi razionâl,

leât al ûs uman ch’al cambia siele

daûr nature e gust, par simpri al vâl.

E je fat naturâl ogni fevele;

ma par ce forme, la nature e lasse

ch’o sedis vô a sielzi la plui biele.

VITA NOVA (XV - XVI)

XV – Dopo la ultime trasfigurazion mi vignì un strapinsîr che nol voleve bandonâmi e che cun me al resonave ta cheste maniere: «Dal moment che tu rivis al pont di cuistâ un aspiet cussì ridicul cuant che tu sês in presince di cheste persone, parcè alore ciristu di cori a viodile? E se jê ti domandàs alc, ce varessistu di rispuindii?». A chest pinsîr i rispuindeve, umil, chest altri: «Se jo no pierdès lis mês fuarcis, e mi sintìs dal dut libar di podêi rispuindi, jo i disarès che cuant che mi imagjini la sô bielece, in chel moment istès mi ven un desideri di viodile tant fuart che al sassine e al disintegre inte memorie dut ce che al podarès fâi cuintri; par chest lis esperiencis dal passât no rivin a gjavâmi il desideri di viodile». Cun chescj pinsîrs o cjapai la decision di scrivi il sonet Ce che al sucêt, par scusâmi cun jê e par fâi capî ce che mi sucêt cuant che o soi in sô presince.

Ce che al sucêt, inte memorie al mûr,

cuant che a viodius o ven, preziose zoie;

e cuant che us stoi daprûf, Amôr daûr

mi dîs: «Scjampe, se di vivi tu âs voie».

L’aspiet al mostre il sblancjament dal cûr,

che, stramurtît, dulà che al pues si poie;

al trime scaturît, poiantsi a un mûr,

e ogni piere si môf e lu scjafoie.

Cui che cussì mi viôt, al fâs pecjât

se l’anime spauride nol confuarte,

se dome par pietât mi mostre dûl,

pietât che vô, sorant, o vês copât,

pietât che e nas de cjaladure muarte

di cui che dome di murî al vûl.

VITA NOVA (XIII-XIV)

XIII – Dopo che o vei vude cheste vision e dopo che o vei metût in rime ce che Amôr mi veve imponût di scrivi, o foi cjapât di tancj pinsîrs contraditoris che mi tentavin e mi scombatevin, cence che mi podès difindi; e cuatri di lôr mi tormentavin al pont che no mi lassavin durmî. Un al jere chest: e fâs ben la signorie di Amôr, che e discjol il so fedêl de meschinitât. Chel altri al jere chest: no fâs ben la signorie di Amôr, parcè che al so fedêl, plui i mostre fedeltât e plui i fâs passâ moments dolorôs. Un altri al jere chest: Amôr al è un non talmentri biel, che al pâr impussibil che la sô influence e sedi il plui des voltis no buine, parcè che i nons a conseguissin a ce che a van a nominâ e, come che si dîs, «nomina sunt consequentia rerum». Il cuart pinsîr al jere chest: la femine, che par jê Amôr ti ten leât in mût tant strent, no je come chês altris feminis, e no cambie facilmentri idee. Ognidun di chescj pinsîrs mi scombateve in mût che jo o jeri come cui che nol sa ce strade cjapâ, che al vûl lâ, ma nol sa indulà lâ; se o cirivi di metiju suntune strade comune, in mût di fâju lâ dacuardi, cheste strade mi jere dal dut precludude, parcè che mi varès metût tai braçs de Pietât. Cheste dramatiche cundizion, che e durave a dilunc, mi à sugjerît di scrivi il sonet A fevelin i miei pinsîrs.

A fevelin i miei pinsîrs di Amôr,

e ducj cun dentri tante varietât,

che un mi laude la sô podestât,

un altri al mostre mat il so valôr,

un altri al da sperance di dolçôr,

sustâ mi fâs un altri disperât;

si acuardin dome tal cirî pietât

pal gno cûr scaturît, dut un tremôr.

E alore jo no sai cui che mi intindi;

o volarès dî, ma no sai dî nuie:

cetante inamorade confusion!

Se ducj us volarès in comunion,

al ocôr clamâ cui che il sanc mi suie,

madone la Pietât, che mi difindi.

VITA NOVA (X - XII)

X – Apene tornât a cjase, mi soi metût a cirî informazions su la femine che il gno signôr mi veve nominât tal viaç dai suspîrs; e, par fâle curte, o dîs che in pôc timp ind ai fat une difese tant solide, che la int e mormorave oltri i limits de discrezion, e chest mi rincresseve une vore. Lis cjacaris e i babeçs a scomençavin a metimi intor la innomine di persone viziose, al pont che la zentilissime, regjine di ogni virtût e fiscadore di ducj i miei vizis, mi dineâ il salût, avenâl de mê beatitudin. Lant fûr un pôc di argoment, o vuei sclarî ce che par me al voleve dî il so salût.

XI – Cuant che jê mi comparive devant tun puest o ta chel altri, la semplice sperance di vê il so salût mi scancelave ogni ostilitât che o vevi dentri e mi conferive une sflamiade di caritât, che mi faseve perdonâ a ducj chei che mi vessin ufindût, e se in chel moment cualchidun mi ves domandât alc, o varès fat muse di umiltât e o varès rispuindût dome «Amôr». E cuant che jê e jere li li par saludâ, un sintiment tant fuart di sbridinâ ducj chei altris sens, mi sburtave fur de muse i voi debilins e ur diseve: «Vait voaltris a onorâ la vuestre amade», e si meteve tal lôr puest. Cui che al voleve savê ce che al è Amôr, al podeve cjalâ il trimâ dai miei voi. Cuant che infin la mê salût mi saludave, no che Amôr si interponès a fluscâ dentri di me une felicitât tant fuarte di no podê sopuartâle, ma cun tante delicatece al cjapave posès dal gno cuarp e lu faseve movi come se al fos inanimât. Al è facil alore di capî che tal so salût e steve la mê beatitudin, che une vore dispès e superave ogni mê resistence.

VITA NOVA ( VIII - IX )

VIII – Lade vie cheste femine zentîl, a Diu i plasè di clamâ a la sô glorie une zovinute une vore biele e une vore amirade ta cheste citât, e jo o vei la ocasion di viodile pognete e bandonade da l’anime, contornade di feminis che a vaivin cun tante pietât. Ta cheste ocasion, cuant che mi inacuarzei di vêle viodude in compagnie de zentilissime, no podei stratignî lis lagrimis; anzit, vaint, o proponei di scrivi alc su la sô muart, par ricompensâle di vêle viodude cualchi volte cu la mê femine, come che o lassi capî tal sonet Vaît, amants.

Vaît, amants, che al vai parfin Amôr,

se o savês il motîf che lu à ingropât.

Amôr al sint adalt clamâ Pietât

di feminis cui voi muei di dolôr.

Vilane muart il so crudêl lavôr

e à tun cûr zentîl inmaneât,

vuastant ce che tal mont al va laudât

te zentilece plui che no l’onôr.

Sintît cemût che Amôr le à onorade:

jo lu ai viodût sustâ in forme vere

sore la biele imagjin cence vite,

cjalant dispès il cîl li che subite

chê anime zentîl logade e jere;

pe sô bielece tant le veve amade.

VITA NOVA ( IV - VII )

IV – Di cheste vision indenant, al scomençà il gno spirt naturâl a no ministrâ plui lis sôs funzions, stant che la anime e jere dute orientade a pensâ a cheste zentilissime; cussì in curt mi fasei tant debil e clopadiç, che il gno aspiet al preocupave i miei amîs, ma tancj altris par maluserie si devin da fâ par savê di me ce che jo o volevi tignî platât. E jo, che mi inacuarzevi des domandis tristis che mi fasevin, par volontât di Amôr che mi vuidave secont lis normis de reson, o rispuindevi che Amôr al jere chel che mi veve ridusût ta cheste cundizion. O disevi Amôr, parcè che te muse o puartavi tantis de sôs olmis, che no podevi scuindilu. E cuant che mi domandavin: «A cause di cui Amôr ti aial fiscât cussì?», jo ju cjalavi ridint e no disevi nuie.

V – Une dì al capità che la zentilissime in glesie e steve li che si sentivin ben lis peraulis dal Magnificat, e jo o jeri tun puest di li che o viodevi la mê beatitudin; e tal mieç de linie drete che e leve di me a jê e steve une femine zentîl une vore biele, che mi voglave dispès, maraveade che jo o cjalàs de sô bande cun tante insistence; e tancj a derin a chest fat tante atenzion, che lant fûr o sintivi dî dongje di me: «Ve cemût che cheste femine e sassine chest puar om»; e fasint il non di jê, o vei capît che a fevelavin di chê che e steve tal mieç tra la zentilissime Beatrice e i miei voi. Alore mi confuartai une vore, parcè che o jeri sigûr che in chê dì il gno segret nol fo tradît dal gno mût di cjalâ. Subite o pensai di fâ di cheste femine zentîl schermi di veretât. E in pôc timp ind ai fat mostre in mût che duçj chei che a fevelavin di me a jerin convints di cognossi il gno segret. Daûr di cheste femine mi soi platât par mês e par agns, e par convinci di plui chei altris, o componei des poesiutis, che mi cjali ben dal ripuartâlis culì, se no pal fat che mi indusès a fevelâ de zentilissime; par chest o ripuartarai dome chês che a somein stadis scritis in laude di jê.

VITA NOVA ( I - III )

I - In che bande dal libri de mê memorie li che devant al è pôc ce lei, al cjate puest un titul che al dîs: «Incipit vita nova». Sot di chel titul o cjati scritis peraulis che o intint ripuartâlis ta chest librut, se no integralmentri, almancul ta chel che par me al è il lôr significât.

II – Nûf voltis dopo de mê nassite il cîl dal Soreli al jere tornât a fâ il so zirament intîr, cuant che denant dai voi mi comparì pe prime volte la gloriose femine dai miei pinsîrs, che tancj a clamavin Beatrice, ma cence savê il vêr parcè. Jê e veve za vivût ta cheste vite cent mês, come a dî che e jere al inizi dal novesim an, cuant che jo o jeri a la fin dal gno novesim. Mi comparì vistude di un sempliç decorôs vistidut ros sanc, bilisiade in mût adat ae zovine etât, cence tropis finecis. A chel pont la mê anime inteletive, ogni facoltât vitâl, che e à sede te bande plui segrete dal cûr, e à scomençât a trimâ tant fuart di fâsi oribilmentri visibil ancje tes plui piçulis pulsazions, cun chestis peraulis: «Ve un diu plui fuart di me, che al ven a dominâmi». A chel pont la anime sensitive, che e à sede inte cjamare dal cerviel li che dutis lis sensazions a puartin lis lôr percezions, e à scomençât a maraveâsi une vore, comunicant aes facoltâts visivis chestis peraulis: «E je comparide la vuestre beatitudin». A chel pont la anime apetitive, che e à sede tal stomi li che si ministre il nestri nudriment, e à scomençât a vaî, disint chestis peraulis: «Puare mai me, di chi indevant o sarai dispès impedide».

UN MISTÎR AL LIMIT DAL IMPUSSIBIL

Italo Calvino al diseve che il passaç di un test leterari intune altre lenghe al pretint ogni volte une sorte di miracul, e al è dificil di fâ miracui se no si metisi in zûc, cun umiltât, cence egoisim e cence vanitât. Un mistîr al limit dal impussibil. Al è stât ancje dit che il tradutôr al è come il psicoanalist: l'unic che al capissi a fonts un scritôr, bon ancje di imbrucjâ sintiments platâts, ambiguitâts, debolecis. In soreplui, la zovine poete performer catalane Yolanda Castaňo e sclarìs che «in poesie nol conte dome chel che si dîs: il respîr, il ritmi e il cidin a completin la peraule». Nol è mistîr par ducj.

Si sa che il tradutôr al è possedût di une fuarce che lu tormente dì e gnot; lui al rumie in continuazion, cuant che al fâs altris lavôrs, cuant che al fevele di alc altri,cuant che al polse, cuant che al duâr, fintremai cuant che nol cjate la peraule juste; il rapuart cul autôr al è intim e misteriôs, e al va oltri de simbiosi: al è une sorte di identificazion psicofisiche che e pues jessi percepide ancje dai estranis; cheste cundizion i permet di scjavâ ogni cjanton dal lûc che al sta visitant-violant e di scuvierzi ancje chel che nol è dit. Une gjonde assolude i da la misure dal obietîf centrât e lu ripaie di ogni fadie.

Il tradutôr furlan de Comedie al è in grât di ripercori il procès di selezion par ognidune des sieltis e par ognidune des omissions operadis tal cors dal so lavôr. Ma lui nol à di fâsi viodi: al à di scomparî parcè che la traduzion e à di fevelâ dibessole. Daûr dal insegnament di Italo Calvino si à di evitâ ogni esibizionisim, ogni vanitât, di mût che no si induvini la entitât de fature fate o de sodisfazion buride fûr dal rapuart privilegiât cul autôr. In te sostance, il compit de buine traduzion al è chel di meti cui che al lei in cundizion di sintîsi in ogni moment in compagnie dal origjinâl e di fâi provâ une fuarte curiositât di leilu, se no altri par madurâ la cussience des trasformazions operadis tal passaç di une lenghe a di chê altre.

TIMPS BICOMPONÛTS - 2

Il valôr aspetuâl dal verp furlan (la perfetivitât de azion, oltri che la relazion di anterioritât tra dôs azions), che al cualifiche i timps bicomponûts, si cumbine ben cu la idee di ocasionalitât che e ven fûr in Dante cuant che al dopre la endiadi. Par esempli cu la endiadi vidi e conobbi Dante al dîs di vê ricognossût tal giron dai ignâfs un personaç dal so timp, forsit chel Celestin V, che, cu la rinunzie al pontificât dopo cinc mês de elezion, al à rindude pussibil la nomine di pape Bonifaci, responsabil par Dante des disgraziis di Florence e dal so esili; duncje un clâr esempli di ignavie. (If III 58-63):

Poscia ch’io ebbi alcun riconosciuto,

vidi e conobbi l’ombra di colui

che fece per viltade il gran rifiuto.

Incontanente intesi e certo fui

che questa era la setta dei cattivi

a Dio spiacenti ed a’ nemici sui.

Daspò ch’o vei uns doi ricognossût,

o ai vût ricognossût l’ombre di cui

che par viltât al fe il grant refût.

Cussì o ai vût capît di soreplui

ch’e e jere chê la schirie dai ignâfs

che a Diu no plasin, ni ai nemîs di lui.

TIMPS BICOMPONÛTS - 1

Tal lengaç dai furlans di marilenghe al jentre dispès un sintagme particolâr che al tocje dute la aree romanze europeane: la bicomposizion dal verp, fenomen gramaticâl ancjemò masse pôc studiât. In circostancis particolârs al sucêt che la azion e vegni savoltade da misteriôs riferiments intrinsics e si cristalizi te forme di un timp bicomponût. Un pâr di esemplis:

«Parcè mai varessie vût frecuentât la vuestre famee, se no par fâ colp sul zovin?».

Cul timp bicomponût si vûl tirâ la atenzion sul fat che une azion ocasionâl, come chê di frecuentâ une famee, e à forsit vût fin dal principi une motivazion secondarie, che e sarès chê di fâ colp sul zovin, motivazion che e pâr jessisi rivelade prioritarie. Ta chest câs il condizionâl passât bicomponût al rispuint a une particolâr disposizion di cui che al fevele (par esempli: valutât il mût di fâ di cheste frute fin de prime zornade, si veve di madurâ cualchi sospiet), e al vûl produsi un efiet particolâr su cui che al scolte (par esempli: o vevis ducj di stâ plui atents), ce che nol capitarès se al fos doprât il semplic condizionâl passât.

«Vessio vude scoltade puare mê mari!».

L’otatîf bicomponût al centre la atenzion su la oportunitât che si à vude - cence otemperâle, stant che cumò si cjatisi tal malafâr - di dâ scolte ai conseis di une mari prime che jê e vignìs a mancjâ.

OCJO AI OMOLEMIS !

BURE & BURE

Ancje in furlan o cjatìn dispès peraulis compagnis te grafie ma diferentis tal significât e chest al ven fûr de lôr etimologjie che, par stradis traviersis, lis à parturidis cun cheste carateristiche e conservadis fintremai in dì di vuê. Bisugne stâ atents a no confondilis.
Il sostantîf feminîl mare al pues vê tancj significâts. Se al ven jù dal latin  a m a r a m  al indiche la colecisti, la borse biliâr; se al ven fûr di  m a t r e m  si riferis ai ferments dal asêt. Te traduzion dal Infier si le fâs vignî fûr di  m a r r a m, "sape", daûr dal biel neologjisim di Dante (If XV 95-96):

però giri la Fortuna la sua ruota
come le piace, e 'l villan la sua marra.

ch'e ziri la Fortune la sô muele
come ch'e vûl, e il coiar la sô mare.

Plui fastidis al à creât bure, che il Nuovo Pirona al pense che al vueli dî "panno grossolano di lana" (NP 83). Cun chest significât si cjate in Pd XI 130-132:

Sigûr che a 'nd è di chês che cun plui cure
a stan dongje il pastôr, tal so convent,
ma e covente pes capis pocje bure.

Ben son di quelle che temono 'l danno
e stringonsi al pastor; ma son sì poche,
che le cappe fornisce poco panno.

Altris linguiscj a pensin che al vueli dî "bugigattolo", "andito oscuro", "stanza angusta", "cantina", "casupola" (Dizionario Etimologico Friulano 283), come che a confermin a pagjine 1446 i Autôrs des "Aggiunte e Correzioni al Nuovo Pirona"; chest significât si cjate ancje te citazion di Ermes di Colorêt, riclamade spes ta chest câs (EC, Poesie, I 248-251):

Un rizzot torteât a urtizzon vie
al cucie plui che 'l parasù o la creste:
inte bure no bite zelosie,
e sazie plui che 'l pan, polente e meste.

Par vêr a àn reson ducj, parcè che si riferissin a dôs peraulis omografis, scritis compagnis ma cun significât diferent. Dante nus da une man parcè che lis dopre dutis dôs.

1. B u r r a m (latin tart, u toniche curte) "spelaie", "resumui de lavorazion de sede o de lane", al da in francês bourre; in talian al da borra; in furlan bure. Dante al dopre un so derivât (If XXV 142-144):

Così vid'io la settima zavorra
mutare e trasmutare; e qui mi scusi
la novità se fior la penna abborra.
NB: se un poco (= se fior) la penna scribacchia, sbava.

Cussì o viodei la setime zavore
trasmudâsi, e o domandi chi perdon
se la plume a la buine un pôc e sbore. 

2. B u r i a m (latin fevelât, u toniche lungje) "rosse scure", al da buio in talian e bure in furlan, "cantine", "cabot", "surisarie". Dante al dopre un so derivât: burella, "burete" (If XXXIV 97-99):

Non era camminata di palagio
là 'v' eravam, ma natural burella
ch'avea mal suolo e di lume disagio.

No jere sale in palaç sflandorôs
chel puest, ben une naturâl burete
ch'e veve pedrât brut e tenebrôs.