EPISTOLE VII

Daspò il falît tentatîf dai Vuelfs Blancs di tornâ a Florence (Bataie de Lastre, 20-VII-1306), i Vuelfs Neris a restarin i esclusîfs parons de citât. Il guvier dai Neris al savè consolidâsi ancje resistint une vore ben a ducj i tentatîfs di tornâ cu la fuarce fats dai partîts mandâts fûr, che a sperarin ancjemò di tornâ a Florence cu la poie di Indrì VII di Lussemburc, elet imperadôr di Gjermanie tal 1308. Indrì, che nol cognosseve avonde ben lis veris cundizions de Italie, al crodè di podê portâi pardut pâs e concuardie e di podê afermâ la sô autoritât su lis fazions in vuere tra di lôr; chest proponiment i ve mertât lis simpatiis di Dante Alighieri e dal cronist Dino Compagni, ma no i ve procuradis aleancis avonde solidis e fidadis.

ESILI E SCONFUART

Tal cors de ultime revision de Comedie, fate par imbastî la liste des corezions aes cantichis, mi soi intivât intune sviste (de stampe?, de traduzion?) une vore interessante. Fevelant di Virgjili cun Forês, Dante al dîs (Pg XXIII 121-123):

«... costui per la profonda

notte menato m'ha d'i veri morti

con questa vera carne che 'l seconda».

«... chel pe profonde

gnot mi à menât di chei par da vêr muarts,

cun cheste viere cjar che lu seconde».

"Viere", e no "vere". Al è un erôr, però ce finece psicologjiche che e ven fûr! O jeri tentât di corezi, ma mi à frenât la convinzion che a Dante i varès plasût anticipâ la francje e corade confidence fate tal congjedâ l'amì, che i à domandât cuant che a podaran tornâ a viodisi (Pg XXIV 76-81):

«Non so»,rispuos'io lui, «quant'io mi viva;	«No sai trop ch'o starai cu la int vive»,
ma già non fïa il tornar mio tantosto,	i rispuindei; «ma nol sarà tant prest,
ch'io non sia col voler prima a la riva;	che no vueli vignî prime a la rive;
però che 'l loco u' fui a viver posto,	parcè che là che o vîf al pâr un puest
di giorno in giorno più di ben si spolpa,	che di ogni ben di dì in dì si spolpe,
e a trista ruina par disposto».	e si prepare al so complet dissest».

Dome ta chest toc de Comedie, e fevelant cuntun amì, Dante al manifeste une strachetât cuasi esistenziâl, che lu puarte a pensâ cence mancul di fâle finide.

UNE COMEDIE INTE COMEDIE

I cjants dal Infier XXI, XXII e buine part dal XXIII (1-57 e 127-148) a son une comedie cun carateristichis propriis, che a somein stacadis dal contest dal poeme. Si trate di une lungje secuence che e à une compate unitât narative e tonâl, li che Dante al sta de bande dai danâts e al met in ridicul i demonis, ministris de autoritât divine: chest par confermâ che a àn tuart ducj chei - e a son ancjemò tancj - che a pensin che la Comedie e sedi dome un tratât di teologjie morâl.

La sene de comedie e je un neri lât di pês bolinte che, pal "transfer" de convertibilitât, si slargje al arsenâl dai Venezians, li che une frenetiche ativitât e anticipe il davoi che al sta par scjadenâsi. La sene e je ancjemò vueide. I baratîrs a son sot de pês. I diaui a son platâts sot dal puint de bolgje, pronts a intervignî "cun cent grifis". Dante al procure di personalizândi cualchidun: il prin nol à non, ma al è ben individuât te persone e tal caratar; chei che a stan li dongje a varan ognidun un non e une part te comedie. Dante e Virgjili a son, plui che no mai, "personaçs" ancje lôr. Vîf il dialic: dai diaui cui danâts, cun Virgjili e tra di lôr; di Virgjili cun Dante; dal baratîr navarês cui diaui e cun Virgjili. Vivis lis descrizions dai mûts di fâ e dai estris che a compagnin il dialic.

SATYAGRAHA (veretât e fuarce)

Io mi rivolsi attento al primo tuono,	Mi fâs atent al scomençâ dal ton,
e "Te Deum laudamus" mi parea	e "Te Deum laudamus" si sintive
udire in voce mista al dolce suono.	tra sun e cjant co misturâts a son.
Tale imagine a punto mi rendea	La stesse sensazion li mi vignive
ciò ch'io udiva, qual prender si suole	pai dolçs rumôrs, ch'e pues vignînus cuant
quando a cantar con organi si stea;	che côr acompagnât di orghin nus rive;
ch'or sì or no s'intendon le parole.	e si sint mo la musiche, mo il cjant.

.

Tal 1980 il compositôr Philip Glass (Baltimore 1937) al regale al mont Satyagraha (in lenghe sanscrite "fuarce de veretât"), une opare liriche che si cumbine cui neurons dal cerviel, tant che la Comedie di Dante. Cheste opare - deventade une icone de musiche contemporanie - e rifâs la storie dai prins agns passâts dal Mahatma Gandhi tal Sud Afriche, cu la proteste no-violente doprade tant che imprest politic. La storie e va indevant e indaûr te vite di Gandhi e e ven proietade tune realtât mitiche, di savôr omeric, che e coinvolç cîl e tiere, e si sostanzie in peraulis e musichis che a crein une esperienze ipnotiche.

TAL INFIER NO SI CJANTE

Inte critiche dantesche un pas impuartant al è segnât de Conversazion su Dante di Osip Mandel'štam, saç scrit tal 1933 pardabon inovatîf che, in pôc plui di quarante pagjinis, al centre il caratar de Comedie. Par Mandel'štam la Comedie e je la opare antimonumentâl e fenomeniche par ecelence, dulà che si proclame la impuartance dal fenomen sensibil tant che materiâl poetic, che al à dirit ae sô plene autonomie, cence la imposizion di simbui metafisics dal dut estranis ae sô sacralitât e ae sô possibilitât di jessi rapresentade ad implen; une posizion che si pues definîle "laiche", in polemiche cu lis corints academichis e simbolistis de critiche dantesche di chel moment e dai secui passâts.

NEOFELIBRISIM DI DANTE

Intai pôcs agns che Pasolini al à vivût in Friûl al à svilupât une apassionade ativitât tor la lenghe furlane - chê di Cjasarse, fevelade di sô mari - doprant il furlan cu la stesse fuarce e il stes amôr dai poetis che ta l'Ete di Mieç a sielzevin di scrivi par volgâr invecit che par latin. Il furlan doprât di Pasolini al jere un ibrit une vore creatîf di furlan di ca da l'aga, cun rârs riferiments ae coinè za avonde normalizade de tradizion leterarie furlane e ae regule stabilide dal dizionari Pirona, ma ben peât aes tradizions orâls, cuntune misture di talian, di venit, di idiosincrasiis personâls: te sostance nuie di diferent, insumis, di chel che al jere il plurilinguisim dal volgâr doprât di Dante te sô Comedie.

EPISTOLE VI

Dopo la epistole ai princips talians dal 1310, la letare ispirade ae vignude in Italie dal imperadôr Indrì VII, scrite ai 31 di Març dal 1311, "scelestissimis Florentinis intrinsecis" (ai disgraziâts Florentins che a vivin in citât) e je la espression dal sidiât amôr dal Poete par Florence: la pietât si alterne al disdegn; lis cridadis e lis menacis si soreponin al proposit di resonâ e di persuadi; e la tension dal sintiment e rive al massim nivel inte vision di un cjastì teribil:

"CONVIVIO" - jentrade

Il Convivio ("Simposi") al è une opare dotrinâl scrite in volgâr jenfri il 1304 e il 1307, dopo il faliment de azion politiche, intant dal esili; al veve di jessi formât di 15 tratâts, un di introduzion e 14 di coment a altretantis cjançons ispiradis a argoments dibatûts tes clapis culturâls dal timp. L'opare e je ferme al cuart tratât, ma dut lasse pensâ che l'Autôr al varès ripiât in man il progjet, une volte finide la Comedie, e une volte tornât a Florence.

EPISTOLE V

Cheste epistole e je la prime des trê che Dante al à scrit in ocasion de vignude in Italie dal imperadôr Indrì VII di Lussemburc. Scrite te Sierade dal 1310, e je dreçade ai rês talians, ai senatôrs romans, ai feudataris, ai rezidôrs dai Comuns. Il Poete al insist sul caratar sacri de imprese, che Diu in persone al à volût, par che e fos restaurade la justizie e a fossin tirâts sù i destins de puare int:

ARMONIE COMPOSITIVE TE COMEDIE

Armonie imitative, convertibilitât de materie poetiche, poliritmie a van a fondisi te perfete armonie compositive de Comedie. Analizìn, par esempli, il preludi dal cjant di Guido di Montefeltri (If XXVII 1-23):

ARMONIE IMITATIVE TAL FURLAN - 2

No si contin te Comedie i tocs trasfomâts in musiche de plume dal Florentin, che tal voltâju par furlan a permetin une cierte autonomie di adatament ae gnove prosodie. In Dante al element fantastic si alterne dispès chel realistic e visîf, par da al implant naratîf consistence e veretât, come tal preludi dal cjant di Pieri de Vigne (If XIII 40-44):

Come d'un stizzo verde ch'arso sia

da l'un de' capi, che da l'altro geme

e cigola per vento che va via,

sì de la scheggia rotta usciva insieme

parole e sangue;...

ARMONIE IMITATIVE TAL FURLAN - 1

In musiche il compositôr al è spes tentât di puartâ dentri il spartît il sclipignâ di une fontane, il cisicâ des fueis e dal vint, il cjant dai uciei, i tons di un temporâl. E je chê armonie imitative che il poete al ricree cul ritmi dal viers o cul sun des peraulis. In Dante, il sborf che al va di cise in cise, sot la scorie de canicule (If XXV 81):

folgore par se la via attraversa.

La velocitât e je dade dal acent iniziâl e dal corisi daûr di trê datii cun trocheu finâl (un hemiepes fundût cuntune clausole datiliche):

fólgore / pàrsela / vìattra / vèrsa

— UU / — UU / — UU / —U

L'efiet contrari Dante lu oten taiant la teste dal viers e scandint il ritmi cuntune cjadene di spondeus, tant che tal trimetri jambic. Pôc prime di fevelâ dal sborf, ancje par dâi a chest plui risalt, al fevele di un danât che al è restât vitime di une spaventose metamorfosi e si slontane a planc dut incocalît (If XXV 78):

parea; e tal sen gio con lento passo.

La lentece e ven fûr te leture ritmiche:

parè-//-aetàl / sengìo / conlèn / topàs / so

U — // U — / U — / U — / U — / U

"CONTECURTE"

La Comedie par furlan si cjate ben ancje intune ostarie ...leterarie, ben si intint !

Si trate de Ostarie Leterarie Contecurte, preseât blog in marilenghe, ami de Comedie. Origjinâl tal so gjenar, al è un blog che al merete di jessi segnalât ai letôrs parcè che lis ideis di fonde dal so passionât ostîr, Raffaele Serafini, e dai soi colaboradôrs a son chês justis par continuâ a sostignî e svilupâ il potenziâl espressîf de lenghe furlane leterarie doprant la forme narative de conte curte in timps "scurtâts" come chei di vuê. Come che al dîs Serafini, " intun marcjât leterari di lenghe minorizade dulà che il probleme plui grant si clame fruibilitât, al pâr che al sedi un bon mieç par esprimisi, rivant a otignî l’unic vêr risultât che al covente al furlan scrit: fâsi lei ".

POLIRITMIE TE COMEDIE PAR FURLAN

Il furlan al pues secondâ la poliritmie de Comedie in maniere creative, sburtantsi fintremai a dâ une man di colôr gnûf, come cui che al interprete un spartît musicâl, ma cence tradî la sostance ritmiche. No si vûl zontâ nuie ae poesie de Comedie, che no 'nd à propit dibisugne; si vûl doprà li che al covente chei tiermins ruspits e slambrâts ("le rime aspre e chiocce", If XXXII 1) che i mancjavin, par sô amission, al Florentin.

Poscia più che 'l dolor potè 'l digiuno (If XXXIII 75).

(leture ritmiche: Pò scia | più che 'l do | lór || po | tè 'l di | giù no).

L'endecasilabi al nas culì de union di un mieç esametri (hemiepes) e di une clausole spondaiche, midiant une cesure pentemimere (pause dopo il tierç acent).

Plui che il dolôr daspò al podè il dizun.

(leture ritmiche: Plùi cheil do | lôr das | pòal po | dèil di | zùn).

POLIRITMIE DE COMEDIE

Il gjeni poliedric di Dante nus fâs fevelâ, oltri che di plurilinguisim e di pluristilisim, ancje di poliritmie. Come che si à za viodût, dongje dal trimetri jambic latin, te Comedie si fâs riferiment ancje al esametri e al pentametri, dispès cubiâts tant che tal distic elegjiac, e nol covente dit che l'endecasilabi al compuarte une grande varietât di ritmis, che a fasin pensâ ai metris grêcs, passâts ai metris latins midiant poetis che a tradusevin o a imitavin i grêcs; a voltis tal endecasilabi si sint il savôr dai tetrametris, dai metris safics o alcaics, dai dimetris jonics, dai asclepiadeus... Par chest nol pâr pussibil fondâ une traduzion de Divine Comedie dute sul pentametri jambic, come chê fate par inglês di Henry W. Longfellow (1807-1882), o piês su une metriche incoerente, vicine ae prose, tipiche di tantis traduzions modernis.

Cualchi esempli al podarà sclarî chest concet :